सिराहा । निषेधित क्रिकेट खेलाडी संघर्ष समितिले मिर्चैयामा नेपाली राष्ट्रिय क्रिकेट टोलीका पूर्व कप्तान पारस खड्काको पुतला दहन गरेको छ। निषेधमा परेका खेलाडीहरूलाई न्याय दिन, प्रतिबन्ध फुकुवा गर्न र क्रिकेट प्रशासन पारदर्शी बनाउनुपर्ने माग राख्दै प्रदर्शन गरिएको हो।

प्रदर्शनमा सहभागीहरूले नेपाल क्रिकेट संघ (क्यान) का निर्णयप्रति असन्तुष्टि जनाए। खेलाडीहरूको भविष्यसँग खेलवाड नगर्न र निषेधित खेलाडीहरूलाई पुनः मैदानमा फर्किने वातावरण तयार गर्न सम्बन्धित निकायलाई उनीहरूले आग्रह गरे।

समितिका प्रतिनिधिहरूले लामो समयदेखि उठाइँदै आएको मागप्रति सुनुवाइ नभएकाले दबाबस्वरूप विरोध कार्यक्रम गर्नुपरेको बताए। पुतला दहनको घटनाले स्थानीय तहमा क्रिकेट प्रशासन र खेलाडी अधिकारको विषयलाई पुनः बहसमा ल्याएको छ।